NOVO PROGRAMA DE "A VOZ DE TERCEIRO"

Ola a tod@s!

Hoxe compartimos con vós o 2º programa da Voz de Terceiro con todas as cousiñas interesantes que nos mandastes. Agardamos que vos guste!

Tamén deixamos aquí 💭 os contidos para o próximo programa, ao igual que á dereita, no enlace de A Voz de Terceiro. Animádevos a mandar as vosas ideas, recomendacións, anécdotas,... porque a todos nos encanta escoitarvos falar.

REUNIÓN ZOOM

Enviamosvos aos vosos correos a información para acceder á reunión de Zoom de mañá. Recordade que non é obrigatoria. Para acceder podedes premer no ENLACE ou, se tedes a aplicación de zoom e preferides, premer en UNIRSE A REUNIÓN e introducir a ID e o CONTRASINAL. Se tedes algún problemiña non dubidedes en escribirnos para que poidamos solucionalo.

Vémonos mañá!

BOS DÍAS

As mestras botámosvos moito de menos e temos ganas de vervos. Así que estivemos a pensar que este venres pola mañá teremos un  vídeo-encontro con vós! Será ás 12:00 e farémolo a través da aplicación ZOOM (Podedes descargala de xeito gratuíto no móbil, tableta ou ordenador). Para iso, enviarémosvos un código ao correo electrónico que nos facilitastes así como información sobre como debedes facer para conectarvos. Non se trata de algo obrigatorio, non é unha clase. Simplemente temos moitas ganas de vervos. Aqueles e aquelas que poidades e queirades, animádevos a conectarvos. Se tivésedes algún problemiña, facédenolo saber para solucionalo.
Recordade que seremos moit@s e a tod@s nos vai apetecer falar, por iso é moi importante respetar os turnos e que escoitemos aos demais, ao igual que faciamos na aula.
Unha aperta moi grande

FELIZ DÍA DAS LETRAS GALEGAS!

O galego está máis vivo ca nunca en cada unha das vosas fermosas palabras. E  agora que están tan engalanadas, xa pode comezar a FESTA DAS LETRAS!🎉🎉

FELIZ DÍA DAS LETRAS GALEGAS!

E sepoñemos un pouco de música?🎶

A VOZ DE TERCEIRO!

Benvidos á vosa radio! 
Benvidos Á VOZ DE TERCEIRO!🎤🎧📻

Ese foi o nome escollido pola maioría dos que fixéstedes a votación. 

Esta semana as mestras estivemos a disfrutar moito escoitándovos falar como verdadeir@s xornalistas da radio, dando consellos, contando anécdotas, facendo adicatorias... Logo, utilizando a maxia da radio, tentamos crear un programa fermoso que agardamos vos guste.

Por razóns de tempo, e vendo a vosa gran  participación, non puidemos meter neste programa todas as recomendacións de xogos, pero non vos preocupedes! quedan pendentes para o vindeiro programa. O mesmo nos sucede coas adicatorias🎶, pero para iso inventamos outro sistema que podedes ver máis abaixo.

Os programas deixarémolos colgados na columna da dereita, e poderedes acceder a eles pulsando en A VOZ DE TERCEIRO. Tamén vos indicaremos alí os contidos para o seguinte programa, para que nos sigades enviando cousiñas interesantes. 

Pois agora si!🎉Arranca o primeiro programa, feito con moito cariño ( e pouca experiencia das mestras) que esperamos que disfrutedes.

LETRAS GALEGAS 2020

O vindeiro domingo é un día moi especial. Todos os 17 de maio celebramos o DÍA DAS LETRAS GALEGAS e, aínda que este ano está aprazado, nós imos aproveitar para celebralo por partida dobre. Por que? A lingua, os idiomas, son un tesouro que temos, e que sorte en Galicia contar con máis dunha. Por que conformarse con falar unha soa lingua cando podemos falar máis?

Para festexalo, propoñémosvos unha sinxela actividade na que nos gustaría que tod@s participarades. Cada un de vós debe pensar nunha palabra en galego que lle pareza fermosa, a máis fermosa de todas ( e temos moitas). Logo escribirédela nun folio en horizontal e decorarédela. Debe estar ben bonita para a festa das Letras! Con todas as imaxes que nos mandades crearemos un gran mural que compartiremos con tod@s os compañeir@s da escola a través da Biblioteca do Centro.  

Pero dádevos présa! Temos que telo listo para o Día das Letras, polo que mandádenos as fotos antes do venres a tarde, para ter tempo de preparar o mural.

QUE A LINGUA VOS ACOMPAÑE! 

 

BO DÍA

COMUNICADO IMPORTANTE

Seguindo as Instrucións do 27 de abril do 2020, da Dirección Xeral de Educación, Formación Profesional e Innovación Educativa para o desenvolvemento do terceiro trimestre do curso académico 2019/20, nos centros docentes da Comunidade Autónoma de Galicia, queríamos informarvos do seguinte: 

CALENDARIO ESCOLAR: O curso continuará ata o día previsto na Orde do 20 de xuño de 2019 que estabelece o calendario escolar para o curso 2019/2020. Este día é o 19 de xuño polo que o terceiro trimestre levarase a cabo.

ACTIVIDADES: Seguindo as mesmas instrucións, as actividades que se impartirán neste trimestre serán de repaso, reforzo ou ampliación de contidos xa vistos. Coa fin de evitar desigualdades, non se avanzará no temario. Polo tanto, consideramos que non son necesarios os libros de texto na casa xa que as actividades relacionadas cos contidos dados xa están feitas. Nos continuaremos a propoñer traballo que reforzará os contidos vistos na aula. Trátase de  favorecer unha rutina de traballo e o hábito de estudo. Con respecto aos contidos non traballados, queremos transmitir tranquilidade. A final de curso, os titores e titoras realizaremos un informe no que quedará reflexado todo aquelo que non foi visto e que será tido en conta polos futuros mestres e mestras do alumnado á hora de planificar o vindeiro curso.

AVALIACIÓN: Como haberá terceiro trimestre, tamén haberá unha avaliación. Para esta teranse en conta as actividades realizadas no primeiro e segundo trimestre, así como as realizadas a partir da suspensión das actividades lectivas presenciais, que contarán sempre de maneira positiva para o alumnado.

Por iso é importante que nos enviedes o traballo que realizades e que sigamos mantendo o contacto de maneira regular. Como ata o de agora podedes facelo a esta dirección de correo electrónico: terceirotilos@gmail.com. Seguiredes atopando no noso blogue Superpoderes de terceiro as actividades propostas. Estaremos á vosa disposición a través de mensaxe en Abalar ou na aula virtual do centro tamén, pero  a nosa forma de traballar seguirá sendo a mesma, a través do blogue e do correo que vos facilitamos ata o de agora. Calquera dúbida ou problema que teñades á hora de acceder ás actividades, agradecemos que nolo comuniquedes para tratar de poñerlle solución.

As mestras de terceiro