Reto 8

Como recordaredes, no primeiro trimestre, en sociais, traballamos o sistema solar, os planetas, os satélites e tamén falamos das estrelas. En concreto, falamos do SOL, que lle da luz e calor á Terra. Porque as estrelas son como bólas de lume que emiten luz e calor continuamente. Aparte do sol, hai moitas máis estrelas, as que vemos cada noite. Pois o reto desta semana vai estar relacionado con isto.
Sabedes que son as constelacións? Seguro que si. Son agrupacións de estrelas no ceo. Cada unha ten unha forma. Ademais, fai moitos, moitos anos, para explicar a súa orixe e a súa forma, inventáronse lendas sobre elas. Hai constelacións que podemos ver sempre, pero hai outras que non. Esto depende da súa posición. Por exemplo, a Osa Maior está situada (aproximadamente) sobre o Polo Norte, por iso sempre a podemos ver.  

Os seres humanos tamén empregamos as estrelas para orientarnos. A Estrela Polar indícanos onde está o norte. Sen embargo, dende o hemisferio sur non é visible desde calquera parte, só en certos puntos.

Aquí deixámosvos un vídeo curtiño sobre a Osa Maior. Debaixo, teredes a explicación do reto que vos propoñemos.

Esta semana queremos que investiguedes sobre estrelas. Teredes que escoller unha constelación, debuxala (podedes empregar a técnica que queirades, non ten por que ser un debuxo nun folio) e despois facerlle unha fichiña con algunha da información que vos indicamos a continuación. (Non é preciso que incluades todo, algunhas lendas son fermosas pero complicadas, e non é necesario que as poñades.)

- Como se chama e que forma ten.

- Desde onde se pode ver.

- Algunha lenda ou historia sobre esta constelación.

- Algunha curiosidade dalgunha estrela que forme parte da constelación que escollestes.

Tamén podedes gravarvos en lugar de facer unha ficha, contándonos esta información (mellor se non se vos ve a cara).
Animámosvos a que, aproveitando o bo tempo, vos asomedes a ver as estrelas  e tratedes de atopar algunha constelación.

Deixámosvos aquí varias ideas de deseño ⇩